قصة الأرملة السوداء كامله بكل اجزاءها
رجعت قربت لعندها والفرحة عم تنط من عيونها: شو قلك عني ؟
ام يامن: الو فترة ما حكيلي عنك.. عرفت انكن متخانقين.. بس عادي يا بنتي حتى الاخوة بيتخانقو وبين المرا وجوزها بصير كتير مشاكل ما تزعلي منو ابني يامن بيريدك
ابتسمت رنيم بخجل: هو قلك انو بدو ياني ؟
ام يامن: ايه.. لما ورجاني صوركون بالخطبة.. سألتو كيفا مرتك احكيلي عنا
رنيم: ايه؟
ام يامن: قلي مرتي حلوة كتير.. ومره كتير.. قلتلو كيف هيك بقى ؟
فتحت رنيم عيونها باستغراب: انا مره !
ام يامن: ايه قام الضرسان ضحك وهيك اشرلي بايدو وقلي متل فنجان القهوة يامو.. فنجان القهوة مر.. بس طعمتو احلى من قطعة السكر لما تشربيه الصبح مع اغاني فيروز على رواق
هيك رنيم يامو.. مره وحلوة
رنيم: ما قلك شي تاني باخر فترة ؟
ام يامن: ايه قلي انك عنيده كتير.. بس حنونة كتير..
توردو خدودها وسألت بتردد: ورؤى ؟
ام يامن: ييي هي مو رفيقتك ؟ الله يرضى عليها دنيا واخره ليل نهار حوالي ما بتتركني بنوب
رنيم: ايوه … اي يجزيها الخير
غمزت لرنيم وشدت على ايدها: لتكوني بتغاري على يامن لك بنتي ؟ هههههه ابني مزوء وبيعرف طعمة ضرسو واكيد ما رح يطلع على حدا غيرك..يئبرني هالوش ما احلاه
رنيم: بعيد الشر عنك خالة
ام يامن: قوليلي مرت عمي تؤبشي البي
ضحكت رنيم وطبطبت على ايدها: عن اذنك انا خليني امشي
ام يامن: بترجعي بتزوريني ها ؟
رنيم: ان شاء الله.. رح حاول
ام يامن: الله معك
قربت رنيم وباست جبين ام يامن بحنية.. حست فيها شي من ريحة امها.. نفس الطيبه والروح الحلوة والبراءة.. وصلت للباب وفتحتو.. وانصدمت وقت شافت يامن ورؤى واقفين عند الباب وعم يحكو..
تطلعو تلاتتهن ببعض..
جمدت عيون يامن هو وعم يشوف رنيم واقفه قدامو.. التقو عيونها بعيونو.. ويا لطيف احيانًا العيون شو بتحكي.. بتحكي كتير.. وبتفضح كتير..
ما كان في حكي ينحكى.. ولا شي ينشرح.. بس عم يتطلعو ببعض.. بدون ولا حركة.. بدون ولا همسة.. كأنو الزمن وقف وما في غيرهن..
تدخلت رؤى بعد دقايق: رنيم شو عم تعملي هون؟
التفتت عليها رنيم وما قدرت تحكي شي..
يامن: اهلين رنيم..
رنيم: عن اذنكن..
